🚨 महागाव-फुलसावंगी रस्त्यावर एसटी-पिकअपची भीषण धडक! पिकअप चालक गंभीर जखमी; बसमधील विद्यार्थी किरकोळ जखमी

YAVATMAL | यवतमाळ | युवा रक्षक वृत्त सेवा.

फुलसावंगी :-  महागाव ते फुलसावंगी रस्त्यावरील काळी जवळ बुधवार, २६ नोव्हेंबर रोजी सकाळी ७ वाजण्याच्या सुमारास एसटी बस व कापूस घेऊन जाणाऱ्या पिकअप वाहनाचा समोरासमोर भीषण अपघात झाला.

वालतुर हून पुसदच्या दिशेने जाणारी वालतुर-पुसद एसटी बस (क्र. MH ४० Y ५०१९) आणि विरुद्ध दिशेने येणारी पिकअप गाडी (क्र. MH २९ BE ४६१५) यांच्यात ही धडक झाली. रस्त्यावरील खड्डे चुकवण्याच्या प्रयत्नात हा अपघात झाल्याची प्राथमिक माहिती आहे.या धडकेत पिकअप वाहनाचा अक्षरश: चुराडा झाला आहे.

अपघातात पिकअप चालक सुभाष देवकर हे गंभीर जखमी झाले आहेत. त्यांना आणि जखमी राजू बोईनवाड यांना तातडीने रुग्णालयात दाखल करण्यात आले आहे. बसमधील शालेय विद्यार्थी व इतर प्रवासी किरकोळ जखमी झाले आहेत.

एसटी बसचे वाहक गजानन बोरके व चालक पंजाबराव राठोड असून, पोलीस या घटनेचा अधिक तपास करत आहेत.