NANDED | उमरी | युवा रक्षक वृत्तसेवा.
उमरी :- रस्त्यावर अपघात झालेल्या एका महिलेसाठी भाजपा नेते आणि VPK समूहाचे चेअरमन , प्रसिद्ध समाजसेवक मारोतराव पाटील कवळे (गुरुजी) देवदूत ठरले. उमरी-कारेगाव रस्त्यावर निमटेकजवळ झालेल्या दुचाकी अपघातात जखमी झालेल्या महिलेला त्यांनी कोणताही वेळ न दवडता स्वतःच्या वाहनातून रुग्णालयात दाखल केले.
•तत्काळ धाव आणि बचाव.
आज बुधवारी सकाळी ११ वाजण्याच्या सुमारास मौजे धानोरा (ता. भोकर) येथील सुरेखा दांगट या महिला दुचाकीवरून जात असताना निमटेकजवळ दुचाकीवरील तोल जाऊन त्या अपघातग्रस्त झाल्या. दुचाकी रस्त्याच्या बाजूला असलेल्या बॅरिकेट्समध्ये पडली आणि सुरेखा दांगट यांना गंभीर मार लागला.
याच दरम्यान, योगायोगाने त्याच मार्गावरून जात असलेले VPK समूहाचे चेअरमन असलेले मारोतराव पाटील कवळे (गुरुजी) यांनी अपघात पाहिला. त्यांनी क्षणभरही विचार न करता आपले वाहन थांबवले आणि तातडीने घटनास्थळी धाव घेतली.
•वेळेवर उपचार: कवळे गुरुजींनी जखमी सुरेखा दांगट यांना कोणताही विलंब न लावता आपल्या वाहनातून उचलले आणि उमरी येथील ग्रामीण रुग्णालयात दाखल केले. त्यांच्या या तत्परतेमुळे महिलेला वेळेत वैद्यकीय उपचार मिळणे शक्य झाले.
•मानवतेचा आदर्श.
कवळे गुरुजींच्या या संवेदनशील कृतीचे उपस्थित नागरिकांनी आणि स्थानिक बोरजुनीचे उपसरपंच विठ्ठल पाटील पवार यांनी मनापासून कौतुक केले. “मानवतेचा खरा अर्थ कवळे सरांनी कृतीतून दाखवून दिला,” अशी भावना नागरिकांनी व्यक्त केली. सामाजिक जाणीव केवळ भाषणातून नाही, तर प्रत्यक्षात कृतीतून कशी दाखवावी, याचा उत्तम आदर्श कवळे गुरुजींनी घालून दिला.