पहिल्या महिला नगराध्यक्षांचा अनुभव आणि जनसंपर्क आगामी लढतीसाठी महत्त्वाचा ठरणार असल्याची चर्चा…..
NANDED | धर्माबाद | युवा रक्षक वृत्तसेवा
धर्माबाद:- धर्माबाद नगरपरिषदेच्या बहुप्रतिक्षित आगामी निवडणुकीसाठी शहरात जोरदार राजकीय वातावरण निर्माण झाले आहे. या निवडणुकीच्या पार्श्वभूमीवर, धर्माबादच्या पहिल्या महिला नगराध्यक्षा वैशालीताई कुलकर्णी यांच्या नावाची चर्चा शहराच्या कानाकोपऱ्यात पुन्हा एकदा जोर धरू लागली आहे. त्यांच्या नावाचा सक्रिय विचार शहरातील नागरिक आणि राजकीय जाणकार करत असल्याचे चित्र दिसत आहे.
वैशालीताई कुलकर्णी यांनी यापूर्वी धर्माबाद नगरपरिषदेच्या यशस्वीरित्या नेतृत्व केले आहे. धर्माबाद च्या पहिल्या महिला नगराध्यक्षा असण्याचा मान त्यांना मिळाला आहे. इतकेच नव्हे तर, त्या तीन वेळा नगराध्यक्षा पद भूषवलेले कै.विनायकराव वसंतराव कुलकर्णी उर्फ बाबा यांच्या सुविद्य पत्नी आहेत. यामुळे, कुलकर्णी कुटुंबाचा जनसंपर्क आणि वारसा शहराच्या राजकारणात आजही महत्त्वाचा मानला जातो.
शहराच्या विकासासाठी आणि समस्या सोडवण्यासाठी वैशालीताईंनी घेतलेले निर्णय, त्यांचा प्रभावी जनसंपर्क आणि प्रशासनावरील त्यांची मजबूत पकड यामुळे त्यांच्याकडे पुन्हा एकदा नेतृत्व सोपवण्याची इच्छा सामान्य जनतेमधून व्यक्त होत आहे. नागरिकांच्या म्हणण्यानुसार, वैशालीताईंच्या अनुभवामुळे आणि दूरदृष्टीमुळे शहराचा विकास अधिक वेगाने होऊ शकतो.
धर्माबाद नगराध्यक्षपदासाठी सर्वसाधारण महिला साठी जागा सोडण्यात आली असून , निवडणुकीत थेट जनतेमधून नगराध्यक्ष निवडला जाणार असल्याची शक्यता असल्याने, ज्या उमेदवाराची लोकप्रियता आणि जनमानसात स्वीकारार्हता अधिक असेल, तोच उमेदवार बाजी मारेल. वैशालीताई कुलकर्णी यांचा सार्वजनिक क्षेत्रातील प्रदीर्घ अनुभव आणि सर्वसामान्यांमध्ये असलेली त्यांची प्रतिमा यामुळे त्यांचे नाव आघाडीवर आहे.
सध्या सर्वच राजकीय पक्षांमध्ये उमेदवारीबाबत जोरदार रस्सीखेच सुरू असली तरी, धर्माबाद च्या जनतेमध्ये मात्र वैशालीताई कुलकर्णी यांच्या नावाभोवतीच चर्चा केंद्रीत झालेली दिसत आहे. त्यांच्या समर्थकांनी आतापासूनच निवडणुकीच्या तयारीला सुरुवात केल्याची माहिती मिळत आहे. त्यामुळे आगामी काळात धर्माबादच्या नगराध्यक्षपदाची लढत अत्यंत चुरशीची होणार यात शंका नाही, पण ‘जनतेचा कौल’ नेमका कोणाकडे जातो हे पाहणे महत्त्वाचे ठरणार आहे.