नगराध्यक्ष पदासाठी कोण ठरणार दावेदार ?
NANDED | देगलूर | युवा रक्षक वृत्तसेवा.
देगलूर/प्रतिनिधी :- देगलूरच्या राजकारणात मोठा फेरबदल घडला आहे. स्थानिक राजकारण आणि सामाजिक क्षेत्रात आपला ठसा उमटवलेले टेकाळे बंधू माजी उपनगराध्यक्ष बालाजी टेकाळे आणि समाजसेवक एकनाथ (बबलू) टेकाळे यांनी राष्ट्रवादी काँग्रेस (अजित पवार गट) मध्ये प्रवेश करून शहरातील राजकीय समीकरणांमध्ये नवीन ऊर्जा भरली आहे.
हा प्रवेश सोहळा आमदार प्रतापराव पाटील चिखलीकर आणि माजी मंत्री भास्करराव पाटील खतगावकर यांच्या हस्ते पार पडला. यावेळी माजी आमदार सुभाष साबणे, ओमप्रकाश पोकर्णा, अविनाश घाटे, राष्ट्रवादी काँग्रेसचे उत्तर जिल्हाध्यक्ष बाळासाहेब रावणगावकर, दक्षिण जिल्हाध्यक्ष शिवराज होटाळकर, कार्याध्यक्ष माधव पावडे, शहराध्यक्ष देवेंद्र मोतेवार, तसेच अंकुश देसाई देगावकर, संतोष नारलावार सावकार यांसह अनेक मान्यवर उपस्थित होते.
टेकाळे बंधूंसह बसवराज द्याडे, लक्ष्मण पाशमवार आदी प्रमुख कार्यकर्त्यांनीदेखील राष्ट्रवादी काँग्रेसमध्ये प्रवेश केला आहे. या प्रवेशामुळे राष्ट्रवादी काँग्रेसला देगलूर शहरात मोठे बळ मिळाल्याचे मानले जात आहे.
बबलू टेकाळे हे ‘खुशी सेवाभावी संस्था’चे अध्यक्ष असून, पूरग्रस्तांना मदत, अन्नदान, अंध विद्यार्थ्यांना साहित्य वितरण यांसारख्या कार्यामुळे त्यांनी जनतेत आपली वेगळी ओळख निर्माण केली आहे. त्यांच्या या लोकप्रियतेचा फायदा पक्षाला आगामी नगरपरिषद निवडणुकीत होईल, अशी अपेक्षा व्यक्त केली जात आहे.
दरम्यान, नगराध्यक्ष पद ओबीसी (महिला) प्रवर्गासाठी आरक्षित असल्याने, टेकाळे बंधूंकडून या पदासाठी उमेदवारी देण्याची शक्यता व्यक्त केली जात आहे. शहरात याबाबत चर्चेला उधाण आले असून, “टेकाळे बंधूंमध्ये नेमका कोण नगराध्यक्ष पदासाठी लढणार?” हा प्रश्न सध्या चर्चेचा विषय ठरला आहे.
राजकीय विश्लेषकांच्या मते, टेकाळे बंधू हे आगामी नगराध्यक्ष पदाचे प्रमुख दावेदार ठरू शकतात. राष्ट्रवादी काँग्रेसकडून अंतिम उमेदवार कोण असेल हे अजून स्पष्ट झाले नसले, तरी टेकाळे बंधूंच्या प्रवेशामुळे देगलूरच्या राजकारणात मोठे उलथापालथ घडल्याचे चित्र स्पष्ट दिसते…