📰 व्ही.पी.के. उद्योग समूहाचा ऐतिहासिक विक्रम: एकाच दिवशी ५५७० मेट्रिक टन उसाचे गाळप!

NANDED | उमरी | युवा रक्षक वृत्तसेवा.

सिंधी/कुसुमनगर:-  व्ही.पी.के. उद्योग समूहाच्या व्यवस्थापनाखालील तिन्ही साखर कारखान्यांनी दिनांक ३० नोव्हेंबर २०२५ रोजी एकाच दिवसात ५५७० मेट्रिक टन उसाचे विक्रमी गाळप करून एक नवा इतिहास रचला आहे. समूह अध्यक्ष मा. श्री. मारोतराव पाटील कवळे गुरुजी आणि मुख्य कार्यकारी अधिकारी (CEO) संदीप पाटील कवळे यांच्या कुशल मार्गदर्शनाखाली हे उत्तुंग यश संपादन झाले आहे.

व्ही.पी.के. समूहातील व्ही.पी.के. कारखाना सिंधी, डॉ. शंकरराव चव्हाण कारखाना कुसुमनगर, आणि एम.व्ही.के. कारखाना कुसुमनगर या तिन्ही युनिट्सनी पूर्ण क्षमतेने काम करत ऊस गाळपाचा हा विक्रम नोंदवला.

समूहाचे जनसंपर्क अधिकारी यु.जी. कदम यांनी दिलेल्या माहितीनुसार, या ऐतिहासिक कामगिरीचे संपूर्ण श्रेय अधिकारी, कर्मचारी, कामगार, ऊस वाहतूक ठेकेदार आणि ऊस उत्पादक शेतकरी या सर्वांच्या अथक परिश्रमाला आणि सांघिक भावनेला जाते. व्यवस्थापनाने या सर्व घटकांचे हार्दिक अभिनंदन केले आहे.

मा. श्री. मारोतराव पाटील कवळे गुरुजी आणि सी.ई.ओ. संदीप पाटील कवळे यांनी या यशाबद्दल समाधान व्यक्त केले आहे. तसेच, पुढील गाळप हंगामात यापेक्षाही अधिक उच्चांक गाठण्याचे उद्दिष्ट ठेवले असून त्यासाठी सर्वांना शुभेच्छा दिल्या आहेत.

व्ही.पी.के. समूहाच्या या विक्रमी कामगिरीमुळे साखर उद्योगात एक सकारात्मक संदेश गेला असून, कारखान्याची कार्यक्षमता आणि परिसरातील शेतकऱ्यांचा विश्वास अधिक दृढ झाला आहे.