NANDED | धर्माबाद | युवा रक्षक वृत्तसेवा.
धर्माबाद (प्रतिनिधी): धर्माबाद नगरपरिषद सार्वत्रिक निवडणूक २०२५ च्या पार्श्वभूमीवर शहरातील प्रभाग क्रमांक १ (अनुसूचित जाती महिला राखीव) मध्ये मोठी राजकीय उलथापालथ होण्याची चिन्हे आहेत. तब्बल २४ तास जनसेवेत झोकून देणारे लोकप्रिय समाजसेवक भगवान कांबळे यांच्या सुविद्य पत्नी सौ. सुरेखा भगवान कांबळे यांनी या प्रभागातून उमेदवारीसाठी जोरदार तयारी सुरू केली आहे.
•कोरोना काळातील सेवेमुळे मतदार ‘मतदान रुपी आशीर्वाद’ देणार
भगवान कांबळे हे गेल्या अनेक वर्षांपासून ‘ना नफा ना तोटा’ या तत्त्वावर नागरिकांच्या सेवेत आहेत. पत्रकारितेच्या माध्यमातून आवाज उठवण्यासोबतच, त्यांची रुग्णवाहिका (ॲम्ब्युलन्स), मिनी स्वर्गरथ, शितशव पेटी आणि ऑक्सिजन मशीन यांसारख्या सेवा गोरगरीब जनतेसाठी वरदान ठरल्या आहेत. विशेषतः कोरोना महामारीच्या कठीण काळात त्यांनी केलेली निस्वार्थ सेवा नागरिकांच्या स्मरणात आहे.
“भगवान कांबळे कोणत्याही पदावर नसताना इतकी सेवा करतात. नगरसेवक झाल्यावर ते यापेक्षाही अनेक समाजोपयोगी कामे करू शकतात आणि प्रभागातील अनेक समस्या सोडवू शकतात,” अशा भावना नागरिकांमधून व्यक्त होत असून, सुरेखा कांबळे यांना जनतेच्या उमेदवार म्हणून पुढे आणले जात आहे.
•राष्ट्रवादी काँग्रेस (अजित पवार गट) कडे उमेदवारीसाठी अर्ज
प्रभागातील नागरिकांच्या अपेक्षा पूर्ण करण्यासाठी सौ. सुरेखा भगवान कांबळे यांनी राष्ट्रवादी काँग्रेस पक्षाच्या (अजित पवार गट) माध्यमातून निवडणुकीत उतरण्याची इच्छा व्यक्त केली आहे. त्यांनी पक्षाचे शहराध्यक्ष नरेश रेड्डी आरकलवार यांच्या मार्फत अधिकृतपणे उमेदवारीसाठी अर्ज दाखल केला आहे.
यावेळी नायगाव विधानसभा अध्यक्ष शिवराज पाटील गाडीवान, जिल्हा उपाध्यक्ष अशोक पाटील वडजे, माजी उपनगराध्यक्ष व कुंडलवाडी चे पक्ष निरीक्षक रमेश तिवारी, सामाजिक न्याय विभागाचे तालुकाध्यक्ष गंगाधर धडेकर, तालुका कार्याध्यक्ष नारायण पाटील पवार, तालुका सरचिटणीस सतीश पाटील शिंदे, कृष्णा मुळे, चंदर मिसाळे सर , गंगाधर वाघमारे सर, पत्रकार सुदर्शन वाघमारे, विजय आप्पा स्वामी, अविनाश धडेकर, मनोज कांबळे , उदय वाघमारे , प्रवीण वाघमारे, अजय कांबळे तसेच पक्षाचे प्रमुख पदाधिकारी आणि मोठ्या संख्येने नागरिक उपस्थित होते.
• ‘२० वर्षांचा बॅकलॉग भरून काढणार; प्रभागाचा चेहरा-मोहरा बदलेल!’ – भगवान कांबळे.
यावेळी बोलताना भगवान कांबळे यांनी प्रभागाच्या मागील राजकीय इतिहासावर बोट ठेवले. ते म्हणाले, “मागील १५-२० वर्षांत प्रभाग क्रमांक १ नगर परिषदेच्या सत्तेत प्रभावीपणे सहभागी होऊ शकला नाही. त्यामुळे विकासाच्या बाबतीत तो मागे पडला आहे.”
ते ठामपणे म्हणाले, “माझे ध्येय स्पष्ट आहे—प्रत्येक नागरिकाला मूलभूत सोयी-सुविधा मिळाव्यात आणि विकासाची गती वाढावी. जर जनतेने माझ्या पत्नीला विजयी केले, तर मी प्रभागाचा चेहरा मोहरा बदलून दाखवेल!”
सामाजिक बांधिलकी आणि जनसेवेच्या बळावर सुरेखा कांबळे यांनी प्रभाग क्र. १ मध्ये एक मजबूत दावेदारी उभी केली असून, या जागेवरील निवडणूक अत्यंत चुरशीची होणार असल्याचे स्पष्ट संकेत मिळत आहेत.