NANDED | धर्माबाद | युवा रक्षक वृत्तसेवा.
धर्माबाद :- सरदार वल्लभभाई पटेल यांच्या १५० व्या जयंतीचे औचित्य साधून राष्ट्रीय एकात्मतेचा आणि अखंडतेचा संदेश जनमानसात पोहोचविण्यासाठी नांदेड जिल्हा पोलीस यांच्या मार्गदर्शनाखाली पोलीस स्टेशन, धर्माबाद यांच्या वतीने ‘रन फॉर युनिटी’ (Run for Unity) या भव्य दौडचे आयोजन केले आहे. शुक्रवार, दि. ३१ ऑक्टोबर २०२५ रोजी सकाळी ही दौड होणार असून, यासाठी धर्माबाद शहरात उत्साहाचे वातावरण निर्माण झाले आहे.
•राष्ट्रीय एकता दिवसाचे महत्त्व:
भारताच्या स्वातंत्र्यानंतर ५०० हून अधिक संस्थानांचे एकत्रीकरण करून देशाला एका धाग्यात बांधण्याचे ऐतिहासिक कार्य सरदार पटेलांनी केले. त्यांच्या या महान कार्याचे स्मरण म्हणून त्यांच्या जयंतीचा दिवस ‘राष्ट्रीय एकता दिवस’ (National Unity Day) म्हणून साजरा केला जातो. या दिनाचे महत्त्व अधोरेखित करण्यासाठी नांदेड पोलीस दलाने हा स्तुत्य उपक्रम हाती घेतला आहे.
•दौडचा निश्चित मार्ग आणि वेळ:
सकाळी ६:३० वाजता या एकता दौडचा प्रारंभ एल.बी.एस (LBS) कॉलेज समोर, धर्माबाद येथून होणार आहे.
•दौडचा मार्ग पुढीलप्रमाणे असेल:
प्रारंभ स्थळ: एल.बी.एस(LBS) कॉलेज → आंध्रा बसस्टँड → समाप्ती स्थळ: राजाराम काकाणी विद्या मंदिर, धर्माबाद.
•नागरिकांना सहभागी होण्याचे आवाहन:
या महत्त्वपूर्ण आयोजनात उपविभागीय पोलीस अधिकारी श्री. दशरथ पाटील आणि पोलीस निरीक्षक श्री. सदाशिव भडीकर (पोलीस स्टेशन, धर्माबाद) यांच्या मार्गदर्शनाखाली सर्व अधिकारी व अंमलदार सक्रियपणे सहभागी होणार आहेत.
श्री.दशरथ पाटील व श्री.सदाशिव भडीकर यांनी धर्माबाद शहर आणि परिसरातील शाळा-महाविद्यालयीन विद्यार्थी, खेळाडू, नागरिक तसेच विविध सामाजिक संस्थांच्या कार्यकर्त्यांना या राष्ट्रीय दौडमध्ये मोठ्या संख्येने सहभागी होऊन एकटेच्या संकल्पनेला बळ देण्याचे आवाहन केले आहे.
या ‘रन फॉर युनिटी’ मुळे केवळ शारीरिक फिटनेसचा संदेशच नाही, तर राष्ट्रीय एकात्मतेची भावनाही अधिक दृढ होणार आहे.