‘मोईज सेठ करखेलिकर बिडीवाले’ यांची यशस्वी भेट! धर्माबादच्या वक्फ बोर्डाच्या जागेवरील प्रश्नावर मंत्री माणिकराव कोकाटेंचे ‘तातडीने’ मार्ग काढण्याचे आश्वासन.

NANDED | धर्माबाद | युवा रक्षक वृत्तसेवा.

धर्माबाद :- शहरातील वक्फ बोर्डाच्या जागेवर अनेक वर्षांपासून वास्तव्यास असलेल्या सुमारे ४०० गोरगरीब कुटुंबांना दिलासा देणारी महत्त्वपूर्ण घडामोड समोर आली आहे. या कुटुंबांना कायदेशीर संरक्षण आणि कायमस्वरूपी भाडेकरार पत्र मिळवून देण्यासाठी, येथील ख्यातनाम समाजसेवक मोईज सेठ बिडीवाले यांच्या नेतृत्वाखालील शिष्टमंडळाने थेट मुंबई येथे राज्याचे अल्पसंख्याक, औकाफ व वक्फ बोर्ड कॅबिनेट मंत्री नामदार माणिकराव कोकाटे यांची भेट घेतली. मंत्र्यांनी या मागणीची गांभीर्याने दखल घेत, तातडीने योग्य व कायदेशीर मार्ग काढण्याचे आश्वासन दिल्याने, नागरिकांमध्ये आशेचे वातावरण निर्माण झाले आहे.

•कायमस्वरूपी भाडेकराराची मागणी.

शहरातील मौलाली नगर, रसिक नगर, इंदिरा नगर आणि फुलेनगर या भागांत वक्फ बोर्डाच्या जागेवर सुमारे ३०० ते ४०० कुटुंबे अनेक वर्षांपासून घर बांधून राहत आहेत. या कुटुंबांना भविष्यात कोणतीही अडचण येऊ नये आणि त्यांना स्थैर्य लाभावे, यासाठी त्यांना कायमस्वरूपी भाडेकरार पत्र मिळावे, ही त्यांची प्रमुख मागणी होती. या मागणीला घेऊन गेली अनेक वर्षे पाठपुरावा सुरू होता.

•मोईज सेठ बिडीवाले यांचा स्तुत्य पुढाकार.

या जनहिताच्या प्रश्नाची तीव्रता लक्षात घेऊन धर्माबाद तालुक्यातील मुस्लिम समाजाचे सर्वेसर्वा आणि सर्व समाजासाठी सातत्याने पुढाकार घेणारे मोईज सेठ बिडीवाले यांनी खारीचा वाटा उचलला. त्यांच्यासोबत सामाजिक प्रश्नांवर सातत्याने पाठपुरावा करणारे ताहेर पठाण हे देखील या शिष्टमंडळात सहभागी होते. मोईज सेठ बिडीवाले यांनी मंत्र्यांसमोर शहरातील नागरिकांच्या अडचणींचे सविस्तर विवेचन केले आणि कुटुंबांना कायदेशीर संरक्षण देऊन दिलासा देण्याची ठोस मागणी लावून धरली. त्यांची ही मागणी अत्यंत रास्त आणि समाजाच्या हितासाठी असल्याचे यावेळी दिसून आले. त्यांच्या या तळमळीमुळेच हा प्रश्न थेट मंत्रीमहोदयांपर्यंत पोहोचला.

•मंत्र्यांकडून तातडीच्या कार्यवाहीचे आश्वासन.

या भेटीदरम्यान, नामदार माणिकराव कोकाटे साहेब यांनी मोईज सेठ बिडीवाले यांच्या मागणीचे गांभीर्य ओळखले. त्यांनी संबंधित प्रकरणाचा सखोल अभ्यास करून या कुटुंबांना दिलासा देण्यासाठी तात्काळ योग्य आणि कायदेशीर मार्ग काढण्याचे आश्वासन दिले. मंत्र्यांच्या या सकारात्मक प्रतिसादाबद्दल मोईज सेठ बिडीवाले यांनी समाधान व्यक्त केले.

मंत्र्यांनी दिलेल्या आश्वासनानंतर धर्माबाद शहरातील गोरगरीब कुटुंबांमध्ये दिलासा व आशेचे वातावरण पसरले आहे. मोईज सेठ बिडीवाले आणि ताहेर पठाण यांनी केलेल्या या यशस्वी पाठपुराव्याबद्दल शहरात सर्वत्र त्यांचे कौतुक होत आहे. मोईज सेठ बिडीवाले यांच्यासारख्या तळमळीच्या समाजसेवकांमुळेच नागरिकांच्या समस्यांना योग्य व्यासपीठ मिळते, अशी भावना सर्वत्र व्यक्त होत आहे.