NANDED | उमरी | युवा रक्षक वृत्तसेवा.
उमरी :- राष्ट्रवादी काँग्रेस पक्षाचे उपमुख्यमंत्री अजितदादा पवार यांच्या उपस्थितीत २५ ऑक्टोबर २०२५ रोजी होणाऱ्या ऐतिहासिक पक्षप्रवेश कार्यक्रमाच्या तयारीसाठी उमरी येथे महत्त्वाच्या नेत्यांची बैठक पार पडली. कै. बाबासाहेब देशमुख गोरठेकर महाविद्यालय येथे झालेल्या या बैठकीत, गोरठेकर परिवाराच्या पक्षप्रवेशामुळे नांदेड जिल्ह्यात राष्ट्रवादी काँग्रेस पक्ष (NCP) मजबूत होईल, असा विश्वास नेत्यांनी व्यक्त केला.
या नियोजन बैठकीस राष्ट्रवादी काँग्रेसचे आमदार व नांदेड जिल्ह्याचे नेते प्रतापराव पाटील चिखलीकर, जिल्हाध्यक्ष शिवराज पाटील होटाळकर, माजी आमदार मोहन अण्णा हंबर्डे, युवा नेते शिरीष गोरठेकर, कैलास गोरठेकर, दिलीपरावजी धर्माधिकारी, यांच्यासह धर्माबाद, उमरी व भोकर तालुक्यातील प्रमुख कार्यकर्ते उपस्थित होते.
•’गोरठेकर घराण्याची ताकद मोठी; राष्ट्रवादी नंबर एकचा पक्ष ठरेल’
बैठकीत बोलताना आमदार प्रतापराव पाटील चिखलीकर यांनी महत्त्वपूर्ण विधान केले. ते म्हणाले, “गोरठेकर कुटुंबाची, या घराण्याची ताकद खूप मोठी आहे. गोरठेकर कुटुंब व त्यांचे समर्थक राष्ट्रवादी काँग्रेस पक्षात प्रवेश करत असल्याने, आगामी काळात नांदेड जिल्ह्यात राष्ट्रवादी काँग्रेस पक्ष पहिल्या क्रमांकाचा पक्ष ठरेल.”
•युवा नेत्यांना उचित सन्मान देणार
यावेळी त्यांनी युवा नेते शिरीष भाऊ गोरठेकर आणि कैलास भाऊ गोरठेकर यांच्याबद्दलही महत्त्वाचे वक्तव्य केले. गोरठेकर परिवाराच्या युवा नेत्यांना पक्षात योग्य सन्मान दिला जाईल, असे आश्वासन प्रतापराव पाटील चिखलीकर यांनी दिले. “मी त्यांचा उचित सन्मान करीन,” असे स्पष्ट करतानाच, पक्षप्रवेशानंतर या दोन्ही युवा नेत्यांवर सोपवण्यात येणाऱ्या जबाबदारीबद्दल मात्र त्यांनी कोणतीही ठोस प्रतिक्रिया दिली नाही. मात्र, त्यांना पक्षात सन्मानपूर्वक स्थान मिळेल, हे त्यांनी अधोरेखित केले.
हा पक्षप्रवेश राष्ट्रवादीसाठी ‘गेमचेंजर’ ठरणार असून, नांदेडच्या विकासासाठी अधिक सक्रिय होण्याचा निर्धार या बैठकीत व्यक्त करण्यात आला.