NANDED | धर्माबाद | युवा रक्षक वृत्तसेवा.
करखेली:- नायगाव विधानसभा मतदारसंघाच्या निर्मितीपासून गेली २० वर्षे काँग्रेस पक्षासाठी सक्रिय आणि एकनिष्ठ असलेले कार्यकर्ते शेख जाविद फुलवाले करखेलीकर यांनी आगामी पंचायत समिती निवडणुकीसाठी दावेदारी केली आहे. करखेली गणातून निवडणूक लढवण्याची आपली तीव्र इच्छा त्यांनी व्यक्त केली असून, पक्षाने संधी दिल्यास ‘संधीचे सोनं’ करून दाखवण्याचा निर्धार त्यांनी व्यक्त केला आहे.
कै. वसंतराव चव्हाण यांच्या काळापासून, तसेच भास्करराव पाटील खतगावकर, माजी मुख्यमंत्री अशोकराव चव्हाण आणि विद्यमान खासदार रवींद्र वसंतराव चव्हाण यांच्या नेतृत्वाखाली निष्ठावान कार्यकर्ता म्हणून आपण काम केले असल्याचे करखेलीकर यांनी आपल्या निवेदनात नमूद केले आहे. त्यांनी रोजगार हमी योजना सदस्य म्हणूनही काम केले असून, सामाजिक क्षेत्रात लोकांच्या अडीअडचणी सोडवण्यासाठी सातत्याने कार्यरत आहेत.
•मुस्लिम समाजाला न्याय देण्याची मागणी:
शेख जाविद फुलवाले करखेलीकर यांनी पक्षाचे लक्ष करखेली गणातील सामाजिक समीकरणांकडे वेधले आहे. करखेली गण हा मुस्लिम बहुल असूनही आजपर्यंत कोणत्याही पक्षाने मुस्लिम समाजातील व्यक्तीला निवडणुकीत संधी दिली नसल्यामुळे समाजात तीव्र नाराजी आहे.
आपली मागणी मांडताना करखेलीकर म्हणाले, “आज काँग्रेस पक्षाला सुवर्णसंधी आहे. पक्षाने प्रामाणिक कार्यकर्त्याला आणि मुस्लिम समाजातील प्रतिनिधीला करखेली गणातून पंचायत समिती निवडणुकीला संधी देऊन समाजाल न्याय द्यावा. संधी मिळाल्यास तळागाळातील सर्व समाजाला सोबत घेऊन करखेली गणाचा सर्वांगीण विकास करण्याची आपली कटिबद्धता राहील.”
२० वर्षांची पक्षनिष्ठा आणि सामाजिक कामाचा अनुभव पाहता, शेख जाविद करखेलीकर यांनी करखेली गणाचा विकास करण्यासाठी आपण पूर्णपणे कटीबध्द असल्याचे स्पष्ट केले आहे. आता काँग्रेस पक्ष पंचायत समितीच्या उमेदवारीसाठी करखेली गणातून कोणत्या चेहऱ्याला संधी देतो, याकडे स्थानिक कार्यकर्त्यांसह सर्वांचे लक्ष लागले आहे.